№8 балалар мен жасөспірімдердің мамандандырылған олимпиадалық резерв спорт мектебінде 2007 жылы туған жасөспірімдер командасының салтанатты шығарып салу рәсімі өтті. Айтулы іс-шара аясында тек түлектер ғана емес, сонымен қатар жыл қорытындысы бойынша ерен еңбегімен көзге түскен үздік бапкерлер мен командалар да арнайы номинациялармен марапатталды.

Салтанатты жиынның құрметті қонағы — Астана қаласының Дене шынықтыру және спорт басқармасының бөлім басшысы Жансая Нұрланқызы Айменова сөз сөйлеп, жас спортшыларды мектеп бітірулерімен құттықтады. Ол өз сөзінде жас түлектердің елорда спортының дамуына қосқан үлесін атап өтіп, олардың алдағы кәсіби жолдарына сәттілік тіледі.

Сондай-ақ мектеп директоры Еркебұлан Жомарт құттықтау сөзін жалғап, шәкірттердің жылдар бойғы қажырлы еңбегі мен жетістіктеріне жоғары баға берді. Ол мектеп қабырғасында шыңдалған мінез бен спорттық тәртіптің болашақ белестерде үлкен септігін тигізетініне сенім білдірді.

2007 жылғы жасөспірімдер командасының бас бапкері Асхат Баймулдаев шәкірттеріне алғыс айта отырып, ақ жол тіледі:

«Бұл ұрпақ біздің мектептің мақтанышы. Олардың әрқайсысы үлкен мүмкіндікке ие. Болашақта еліміздің туын халықаралық ареналарда желбірететініне кәміл сенемін», — деді бапкер.

Іс-шара соңында үздік спортшылар мен жаттықтырушыларға естелік сыйлықтар мен грамоталар табыс етіліп, мерекелік суретке түсу рәсімімен аяқталды.